يوم ورا يوم

يوم ورا يوم وسنة ورا سنة
بيعدو علينا يوم حزن ويوم فرح وهنا
ولا الحزن بيدوم ولا الفرح بيستنا عندنا
بس المهم نتمسك بأيمانا فى بربنا
ونحاول دايما.. نحب بعضنا
دا احنا كلنا اخوات والكنيسة امنا
واكيد دمنا واحد وكمان نبض قلبنا
مش عايزين اى موقف ولا اى مشاكل تفرق شملنا
وطول ما احنا سوا هيتشد ويقوى عزمنا
ولا حروب هتضعفنا ولا اى اضطهاد هيهزنا
حقيقى...يعظم انتصارنا..بالذى احبنا

ناهد فاروق

كلنا جايين.. نهنى حبيب الملايين

كل سنة وانت طيب يا حبيب قلبنا
وعيد سعيد عليك يا راعينا كلنا
جايين نهنيك من كل قلوبنا ونبضنا
يا اغلا واعظم هدية من عند ربنا

شاعر.. ودايما شاعر بكل اللى حواليك...
ودايما مادد لينا بالحب ايديك
نتمنى ربنا ياخد من عمرنا كلنا ويديك
وتعيش.. وتعمر.. وكنايسنا كلها تتبارك بيك

تسعة وتلاتين سنة مليانة بالنعمة
وانت بتتفانا.. فى الصلا والخدمة
ومن فمك الذهبى بتمنحنا الحكمة
علمتنا ان الايمان ثابت.. وغير قابل للقسمة

يا خليفة مار مرقص.. كلنا بنحبك
يا اللى دايما راوينا من نهر حبك
ولا كل القلوب فى جمال وحنية قلبك
كلنا بنهنيك.. ابنائك وراعيتك وكل شعبك

يا حبيب الملايين
مسيحيين ومسلمين
دايما صادق امين
ربنا يخليك لينا سنين وسنين وسنين


من كلمات: شاعرة الشهداء
الشاعرة: ناهد فاروق شاروبيم

Facebook Group + محبى الشاعرة ناهد فاروق شاروبيم + شاعرة الشهداء

من يمسك ..يمس حدقة عيني

من يمسك يمس حدقة عينى
كلامك يارب جميل وبيعزينى
بس اعمل ايه وكل اللى حواليا عايز يأذينى
بجد انا مشتاقة لحنانك ومحتاجة حضنك يدفينى
عطشانة لكلامك ..فمن ينبوع تعذياتك اروينى
...ليه بس الدنيا مش مهنيانى ولا عايزة ابدا تراضينى
ما بشوفش منها غير احزان وبالهموم دايما تهدينى
حساكى يا دنيا ماسكة كرباج وعلى ظهرى شغااالة تضربينى
هو مافيش غيرى قصادك ؟..ارجوكى كفاية بأة ارحمينى
ومش كل ما افرد شراعى ..الاقيكى عايزة تغرقينى
نفسى مرة تبتسمى ف وشى وتفرحينى
وماحسش انك مخبيالى سكينة علشان تدبحينى
انا بس كفاية عليا انى احبك وتحبينى

ناهد فاروق شاروبيم

Facebook Group + محبى الشاعرة ناهد فاروق شاروبيم + شاعرة الشهداء

شيل الشوك من راسى

اسمع يسوع بيقولك ايه:

يا ابنى ارجوك شيل الشوك من راسى
انا عشانك اتألمت ولسه منك بآآآسى
انا استحملتك كتير وانت بتعمل ناسى
لسة بتكدب وبتحلف وبتسرق وبتجرح احساسى
...
ناسى انى عشانك استحملت الالم؟؟
ناسى المسامير وخدى اللى اتلطم
ناسى انى احييتك بعد ما كان مصيرك العدم
تعالى يا ابنى..توب وحس بالندم

هتخايف لية؟؟ابوك مستنيك؟؟؟
وبالحب دايما..فاتح احضانه ليك
بس انت ارفعله ايديك
وروح له بدموع عنيك
هيقولك..اهلا وسهلا بيك
دة انا من زمان وانا عينى عليك

كلمات :شاعرة الشهداء
الشاعرة :ناهد فاروق شاروبيم

Facebook Group + محبى الشاعرة ناهد فاروق شاروبيم + شاعرة الشهداء